Poet
hamara zikr aur un ki zaban se
kahan nisbat zamin ko asman se
kahun kyunkar nazar se tu nihan hai
pata apna mila tere nishan se
hua yuun bhi ki us ki samt aksar
chale aur lauT aa.e darmiyan se
jalen jab fasl-e-gul men bhi nasheman
to phir kya kijiye shikva ḳhizan se
fareb-e-zindagi kha.en kahan tak
chura.en aankh marg-e-na-gahan se
havadis pesh aate hain zamin ko
sitare TuTte hain asman se
bashar ke mas.ale hal karne shayad
farishte a.enge ab asman se
janab-e-ḳhizr se puchhen kisi din
mila kya un ki umr-e-javedan se
dabi hai aag jo siine men ‘at.har’
nahin kuchh kam kisi atish-fishan se
Leave a Reply