barf men ḳhud ko badal kar dekhna
phir kisi suraj pe chal kar dekhna
phenk do sar se ye chadar saa.e ki
dhuup phir chehre pe mal kar dekhna
dard phulon ka samajhne ke liye
kanTe hathon se masal kar dekhna
qad hamare saa.e ka bhi hai baḌa
dhuup se apni nikal kar dekhna
jang kar lena sabhi asbab se
apne rab se phir machal kar dekhna
ahmiyat kya hai tire kirdar ki
ḳhud kahani se nikal kar dekhna
‘chand’ ka mushkil safar kaise likhun
aap ḳhud pairon pe chal kar dekhna
Leave a Reply