zulf-e-ḳhamdar men nur-e-ruḳh-e-zeba dekho
chashm-e-baddur mira husn-e-tamanna dekho
ab vo ara.ish-e-gesu se hua hai farigh
ab agar himmat-e-musa ho to jalva dekho
bahr-e-didar karo dida-e-majnun paida
jur.at-e-shauq se phir jalva-e-laila dekho
aaj phir shauq-e-dil-e-zar ki qismat jaagi
aaj phir us ne mujhe pyaar se dekha dekho
nigah-e-lutf se dekha hai to Thahro kuchh der
ab mire dil ke dhaḌakne ka tamasha dekho
jo masiha.i se aari hain unhen kya ma.alum
apne bimar ko tum ḳhud hi ḳhudara dekho
ḳhud chale aao abhi tar-e-nafas hai baaqi
ho nahin pa.ega phir dil ka mudava dekho
aa gaya hai vo yahan nur-e-sahar ki manind
khul gaya jabki mire dil ka daricha dekho
be-sabab zulm ki andhi na chalao mujh par
yuun ujaḌ ja.ega gulzar-e-tamanna dekho
tum ko kuchh yaad hai ghar ghar men mira charcha tha
ab usi shahr men phirta huun main tanha dekho
jo riya-kar hain un se na baḌhao pengen
chashm-e-iḳhlas men ho jaoge rusva dekho
jis ki bina.i se ik shahr hua tha raushan
aaj be-nur hai vo dida-e-bina dekho
ye samajh lo ki vo hai ilm-o-hunar ka madfan
jab kisi shahr men tum ghalba-e-mulla dekho
Leave a Reply