raah men surat-e-naqsh-e-kaf-e-pa rahta huun
har ghadi banne bigadne ko pada rahta huun
umr-e-rafta na kabhi aae manane ke liye
muddaten guzrin ki jiine se khafa rahta huun
sifat-e-kina mira ghar hai falak ke dil men
girah-e-dushman-e-khatir men bandha rahta huun
fitna-e-hashr ye kahta hai mujhe puchhe kaun
daman-e-yar ke gosha men pada rahta huun
qaid huun par sitam-e-ghaflat-e-jauhar se ‘munir’
ghussa ban kar dil-e-zindan men bhara rahta huun
Leave a Reply