ma.il-e-lutf hai amada-e-be-dad bhi hai
vo sarapa-e-mohabbat sitam-ijad bhi hai
shab-e-tanha.i bhi hai saath tiri yaad bhi hai
dil ka kya haal kahun shaad bhi nashad bhi hai
daulat-e-gham se har ik gosha hai is ka ma.amur
dil ki duniya miri abad bhi barbad bhi hai
be-sabab to nahin ehsas ḳhalish ka mujh ko
bhulne vaale tire dil men miri yaad bhi hai
kyuun na asan ho rah-e-ishq ki mere ham-rah
jazba-e-‘qais’ bhi hai himmat-e-‘farhad’ bhi hai
jal gaya apna nasheman magar afsos ye hai
phunkne valon men ik barq-e-chaman-zad bhi hai
mera vijdan muharrik hai mire naghmon ka
tab-e-mauzun miri paband bhi azad bhi hai
kya bata.un main tumhen kya hai nava-e-‘aḳhtar’
naghme ka naghma hai fariyad ki fariyad bhi hai
Leave a Reply