daur-e-aghaz-e-jafa dil ka sahara nikla
hausla kuchh na hamara na tumhara nikla
tera naam aate hi sakte ka tha aalam mujh par
jaane kis tarah ye mazkur dobara nikla
hosh jaata hai jigar jaata hai dal jaata hai
parde hi parde men kya tera ishara nikla
hai tire kashf-o-karamat ki duniya qaail
tujh se ai dil na magar kaam hamara nikla
kitne saffak sar-e-qatl-gah-e-alam the
lakhon men bas vahi allah ka pyara nikla
ibrat-angez hai kya us ki javan-margi bhi
haae vo dil jo hamara na tumhara nikla
ishq ki lau se farishton ke bhi par jalte hain
rashk-e-khurshid-e-qayamat ye sharara nikla
sar-ba-sar be-sar-o-saman jise samjhe the vo dil
rashk-e-jamshed-o-kai-o-khusrau-o-dara nikla
aql ki lau se farishton ke bhi par jalte hain
rashk-e-khurshid-e-qayamat ye sharara nikla
rone vaale hue chup hijr ki duniya badli
shama be-nur hui subh ka taara nikla
ungliyan utthin ‘firaq’-e-vatan-avara par
aaj jis samt se vo dard ka maara nikla
Leave a Reply