Is Qadar Musalsal Thin Shiddaten Judai Ki

is qadar musalsal thiin shiddaten judai ki

aaj pahli baar us se main ne bevafai ki

varna ab talak yuun tha ḳhvahishon ki barish men

ya to tuut kar roya ya ghazal-sarai ki

taj diya tha kal jin ko ham ne teri chahat men

aaj un se majburan taaza ashnai ki

ho chala tha jab mujh ko iḳhtilaf apne se

tu ne kis ghadi zalim meri ham-navai ki

tark kar chuke qasid ku-e-na-muradan ko

kaun ab ḳhabar laave shahr-e-ashnai ki

tanz o taana o tohmat sab hunar hain naseh ke

aap se koi puchhe ham ne kya burai ki

phir qafas men shor uttha qaidiyon ka aur sayyad

dekhna uda dega phir ḳhabar rihai ki

dukh hua jab us dar par kal ‘faraz’ ko dekha

laakh aib the us men ḳhu na thi gadai ki

Leave a Comment