Tahir Faraz
jab mire honTon pe meri tishnagi rah ja.egi
teri ankhon men bhi thoḌi si nami rah ja.egi
sar-phira jhonka hava ka toḌ dega shaḳh ko
phuul banne ki tamanna men kali rah ja.egi
ḳhatm ho ja.ega jis din bhi tumhara intizar
ghar ke darvaze pe dastak chiḳhti rah ja.egi
kya ḳhabar thi aa.ega ik roz aisa vaqt bhi
meri goya.i tira munh dekhti rah ja.egi
vaqt-e-ruḳhsat aa.ega aur ḳhatm hoga ye safar
mere dil ki baat mere dil men hi rah ja.egi
Leave a Reply