Dagmagate kabhi qadmon ko sambhalte dekha
rah-e-ulfat pe magar logon ko chalte dekha
nafraten mil ga.iin ma.asum dilon men akasr
chahaton ko dil-e-saffak men palte dekha
hausla tha koi maqsad ya saliqa, us ko
vaqt ke tund thapeḌon men sambhalte dekha
jin ko paala tha baharon ne jahan bhar kii, unhen
azma.ish ki kaḌi dhuup men jalte dekha
be-jhijhak chal na saka dasht-e-vafa men ab tak
rukte dekha kabhi us shoḳh ko chalte dekha
sabza-o-gul pe hava rakhti hai shabnam lekin
phir hava ko un hi qatron ko kuchalte dekha
shahar ya shahar se bahar nahin, apne ghar men
ham ne aqdar-e-zamana ko badalte dekha
azma.ish hai, ijazat hai ki majburi hai
zulm ko ham ne yahan phulte-phalte dekha
atish-e-ishq se bachiye ki yahan ham ne bhi
mom ki tarah se patthar ko pighalte dekha
apne jazbat to mash.hur the lekin ham ne
the jo hoshyar bahut un ko ubalte dekha
Daal di pairon men us shaḳhs ke zanjir yahan
vaqt ne jis ko zamane men uchhalte dekha
buzla-sanji pe bahut naaz tha jin ko apni
ham ne un ko bhi yahan zahr ugalte dekha
roz ye mashriq-o-maghrib ka tamasha kyuun hai
ugte dekha hai jise us ko hi Dhalte dekha
aa gaya yaad vo bachpan ka zamana ‘ḳhalid’
jab kahin phuul se bachchon ko uchhalte dekha
Leave a Reply