agar tum dil hamara le ke pachhta.e to rahne do
na kaam aa.e to vapas do jo kaam aa.e to rahne do
mira rahna tumhare dar pe logon ko khaTakta hai
agar kah do to uTh ja.un jo rahm aa.e to rahne do
kahin aisa na karna vasl ka va.ada to karte ho
ki tum ko phir koi kuchh aur samjha.e to rahne do
dil apna bechta huun vajibi daam us ke do bose
jo qimat do to lo qimat na di jaa.e to rahne do
dil-e-‘muztar’ ki betabi se dam uljhe to vapas do
agar marzi bhi ho aur dil na ghabra.e to rahne do
Leave a Reply