hamin the jan-e-baharan hamin the rang-e-tarab
hamin hain bazm-e-mai-o-gul men aaj mohr-ba-lab
vahi tujhe bhi nazar aa.e be-adab jo log
faqih-e-shahr se uljhe tiri gali ke sabab
ḳhayal-o-fikr ke phir silsile sulag na uThen
ki chubh rahi hai dilon men hava-e-gesu-e-shab
bas ek jaam ne rindon ki aabru rakh li
vagarna kam na tha vaa.iz ka shor-e-ghaiz-o-ghazab
chalo kali ke tabassum ka raaz puchh aa.en
gulon ke qafile chal den chaman se jaane kab
abhi se dhaḌkanen ḳhamosh hoti jaati hain
ajiib hoga saman vo bhi tum na aaoge jab
hamen hi tab-e-sama.at na ho saki ‘rahat’
fasana-ḳhvan ne to chheḌa tha zikr-e-ahd-e-tarab
Leave a Reply