na bahte ashk to tasir men siva hote
sadaf men rahte ye moti to be-baha hote
mujh aise rind se rakhte zarur hi ulfat
janab-e-shaikh agar ashiq-e-khuda hote
gunahgaron ne dekha jamal-e-rahmat ko
kahan nasib ye hota jo be-khata hote
janab-e-hazrat-e-naseh ka vaah kya kahna
jo ek baat na hoti to auliya hote
mazaq-e-ishq nahin shekh men ye hai afsos
ye chashni bhi jo hoti to kya se kya hote
mahall-e-shukr hain ‘akbar’ ye darafshan nazmen
har ik zaban ko ye moti nahin ata hote
Leave a Reply