Aankhon Mein Bas Ke Dil Mein Sama Kar Chale Gae

ankhon men bas ke dil men sama kar chale gae

khvabida zindagi thi jaga kar chale gae

husn-e-azal ki shaan dikha kar chale gae

ik vaqia sa yaad dila kar chale gae

chehre tak astin vo la kar chale gae

kya raaz tha ki jis ko chhupa kar chale gae

rag rag men is tarah vo sama kar chale gae

jaise mujhi ko mujh se chura kar chale gae

meri hayat-e-ishq ko de kar junun-e-shauq

mujh ko tamam hosh bana kar chale gae

samjha ke pastiyan mire auj-e-kamal ki

apni bulandiyan vo dikha kar chale gae

apne farogh-e-husn ki dikhla ke vusaten

mere hudud-e-shauq badha kar chale gae

har shai ko meri khatir-e-nashad ke liye

aina-e-jamal bana kar chale gae

aae the dil ki pyaas bujhane ke vaste

ik aag si vo aur laga kar chale gae

aae the chashm-e-shauq ki hasrat nikalne

sar-ta-qadam nigah bana kar chale gae

ab karobar-e-ishq se fursat mujhe kahan

kaunain ka vo dard badha kar chale gae

shukr-e-karam ke saath ye shikva bhi ho qubul

apna sa kyuun na mujh ko bana kar chale gae

lab tharthara ke rah gae lekin vo ai ‘jigar’

jaate hue nigah mila kar chale gae

Leave a Comment