Tasneem Abidi
hava-e-sham chale to bikharne lagti huun
main dasht-e-dil se simaT kar guzarne lagti huun
azal se ta-ba-abad ek lamha mera hai
tiri nigah men jis dam Thaharne lagti huun
nazar ke lams se rang-e-badan chhupati rahi
main titliyon ki tarah kyon ki marne lagti huun
mili firaq ke a.ine men panah mujhe
visal-e-harf men Dhal kar sanvarne lagti huun
varaq pe saada tamanna ke ḳhal-o-ḳhad hain magar
main soch kar tujhe kuchh rang bharne lagti huun
jab agahi ke ḳhadd-o-ḳhal dekhti huun kabhi
to apne husn-e-tahayyur se Darne lagti huun
agar tu va.ada nibhata nahin to us lamhe
main apne aap se bhi ḳhud mukarne lagti huun
Leave a Reply