abrar-kiratpuri

Numayan Jab Wo Apne Zehn Ki Taswir Karta Hai

numayan jab vo apne zehn ki tasvir karta hai

har ik ahl-e-mohabbat ko bahut dil-gir karta hai

vo kyuun masrur hota hai hamara khuun bahne se

sar-e-haq kis liye zalim tah-e-shamshir karta hai

vafa ka naam leta hai vafa-na-ashna ho kar

vo khud ko intihai parsa taabir karta hai

jise mahrum hona hai vahi hai mutmain yaaro

jo hai nusrat ka talib har qadam tadbir karta hai

har ik insan ke aamal bhi yaksan nahin hote

koi ghar tod deta hai koi taamir karta hai

sadaqat par kabhi un ka asar hone nahin paata

vo apne karnamon ki bahut tash.hir karta hai

koi bhi masala ‘abrar’ hal hone nahin paata

masail vo hamare surat-e-kashmir karta hai

More Poems

Leave a Comment