Usne Har-Su DhunDa Hoga

us ne har-sū DhūñDā hogā

koī bhalā kyā mujh sā hogā

lamhe bhar ke sāthī the ham

lamha-bhar ko sochā hogā

merā mansab jalnā hī thā

ab vo bādal barsā hogā

ḳhvāb-nagar kā sāthī thā jo

ḳhvāb-nagar meñ khoyā hogā

pahle pahar meñ yaad jo aayā

sub.h talak vo jaagā hogā

itnā us ko chāhā kyuuñ thā

ik din ḳhud se pūchhā hogā

tez havā meñ girte shajar ko

us ne shāyad dekhā hogā

patte jab kuchh bikhre hoñge

mere liye bhī sochā hogā

tanhā shajar kī sūrat ‘ādil’

duur kahīñ kā saaya hogā

Leave a Comment