Hamidi Kashmiri
ḳhud ḳhamoshi ke hisaron men rahe
raat bhar charche sitaron men rahe
thi zamin-e-gul nazar ke samne
jada-paima reg-zaron men rahe
ho ga.e hain kitne manzil-ashna
kitne rah-rau rahguzaron men rahe
ho ga.iin gharqab kitni bastiyan
kitne tufan jo.ebaron men rahe
zulmat-e-shab paas aa sakti nahin
muddaton ham mah-paron men rahe
hai ḳhizan ki dhuul ki tan par tahen
ham rahe to nau-baharon men rahe
Leave a Reply