Qayyum Nazar
jaa.en ghuḌ-dauḌ par ki khelen taash
‘mir’-ji raz-e-ishq hoga faash
pattharon men laga rahe hain jonk
chand men ḳhun-e-garm ki hai talash
yuun jhagaḌte hain jhuTi qadron par
zan-e-fahish pe jis tarah aubash
na.e andaz se hanut hui
ab na bu degi zindagi ki laash
uḌ gaya bhaap ban ke dil ka lahu
ab zamin duur hai qarib akash
hue mafluj vo bhi jin ke liye
ek aalam tha bar-sar-e-parḳhash
lala-e-koh ko dimagh nahin
nashsha laati hai muḳhtalif ḳhashḳhash
kaise bhukon marenge itne log
be-huda ahd-e-nau men fikr-e-qimash
haf-iqlim ke ḳhazanon par
haath Dalenge an-ginat qallash
ab na aaya hisar se bahar
naqsh men ḳhud hi Dhal gaya naqqash
rashk-e-gul hon ki misl-e-nashtar hon
yahi naḳhun ‘nazar’ men zaḳhm-tarash
Leave a Reply