Shakeel Badayuni
badle badle mire gham-khvar nazar aate hain
marhale ishq ke dushvar nazar aate hain
kashti-e-ghairat-e-ehsas salamat yarab
aaj tufan ke asar nazar aate hain
inqalab aaya na jaane ye chaman men kaisa
ghuncha-o-gul mujhe talvar nazar aate hain
jin ki ankhon se chhalakta tha kabhi rang-e-khulus
in dinon mail-e-takrar nazar aate hain
jo suna karte the hans hans ke kabhi nama-e-shauq
ab miri shakl se bezar nazar aate hain
un ke aage jo jhuki rahti hain nazren apni
is liye ham hi khata-var nazar aate hain
dushman-e-khu-e-vafa rasm-e-mohabbat ke harif
vahi kya aur bhi do-char nazar aate hain
jins-e-nayab-e-mohabbat ki khuda khair kare
bul-havas us ke kharidar nazar aate hain
vaqt ke pujne vaale hain pujari un ke
koi matlab ho to gham-khvar nazar aate hain
jaeza dil ka agar lo to vafa se khali
shakl dekho to namak-khvar nazar aate hain
roz-e-raushan men agar un ko dikhao taare
vo ye kah denge ki sarkar nazar aate hain
ham na badle the na badle hain na badlenge ‘shakil’
ek hi rang men har baar nazar aate hain
Leave a Reply