Tariq Qamar
zehn par bojh raha, dil bhi pareshan hua
in baḌe logon se mil kar baḌa nuqsan hua
maat ab ke bhi charaghon ko hui hai lekin
chaak is baar hava ka bhi gareban hua
oḌhe phirta huun shahadat ki lahu-rang qaba
rang tera tha so vo hi miri pahchan hua
adatan aankh chhalak uTThi hai hanste hanste
tu mire dost bila-vaj.h pareshan hua
tez paani ki si avaz gale se nikli
aur sun kar ise ḳhanjar baḌa hairan hua
shaḳh-e-dil par na khila ab ke baras ek bhi phuul
kaisa abad tha ye baagh jo viran hua
dost kya ab to munafiq bhi koi saath nahin
sukhe phulon se bhi mahrum ye gul-dan hua
aaj is darja mohazzab jo nazar aata hai
ye vo insan hai sadiyon men jo insan hua
dil se jaata nahin ‘tariq’ kisi kafir ka ḳhayal
ham musalman hue dil na musalman hua
Leave a Reply