naz-o-ghamza-numa kalam aa.e
tere naame the mere naam aa.e
ham kise ham-safar kahen ki yahan
jitne saath aa.e chand gaam aa.e
jaane kya baat hai ki tere huzur
lab pe har baat na-tamam aa.e
haa.e tujh bin tujhe ḳhabar hi nahin
kitne be-kaif sub.h-o-sham aa.e
ek tere ḳhulus-e-dil ke siva
ham kahin se na tishna-kam aa.e
ab Thaharti nahin kahin bhi nazar
de dua koi ya salam aa.e
‘daur’ kya kufr hai ki ab lab par
allah allah na raam raam aa.e
Leave a Reply