ba-sad aarzu jo vo aaya to ye hijab-e-ishq se haal tha
ki hazaron dil men thiin hasraten aur uthana aankh muhal tha
raha shab jo ham se juda koi to kahe ye vaqia kya koi
shab-e-hijr thi ki bala koi jise dekhte hi visal tha
rukh-e-yar ta na pada nazar rahe ham alam se ye nauhagar
ki hamare ranj-o-malal par to malal ko bhi malal tha
kare kaun us se barabari mah-o-zohra sab ko thi ham-sari
dam-e-subh dekh sitamgari rukh-e-mahr zarra-misal tha
shab-e-vasl dekh ke khvab men main pada tha sakht azaab men
the hazar soch javab men ajab us ka mujh se saval tha
mire josh-e-ashk se bahra-var hue kul jahan ke bahr-o-bar
na barasti aaj ye chashm-e-tar to khuda-na-khvasta kaal tha
jo numud karte hi aap se lage baithne vo shitab se
to ye puchhe koi hubab se ki phulae apne ye gaal tha
hava main bhi dakhil-e-kushtgan to abas tu hove hai sar-garan
ki mire gale ki taraf miyan tire ab-e-tegh ka dhaal tha
diya kha ke aap ne paan jo dil-e-mubtala hua surkh-ru
use samjha pet ka bojh vo jo tumhare munh ka ugaal tha
jo mariz tha pada jan-ba-lab khabar aur kuchh nahin us ki ab
magar itna kahte hain log sab ki bada ye nek-khisal tha
jo chaman se duur qafas hua to main aur asir-e-havas hua
ye jo zulm ab ke baras hua yahi qahr agle bhi saal tha
nahin chahta hai ab asman ki ham aur vo huun ba-yak-makan
kahin aa gaya jo vo shab ko yaan ki bulana jis ka muhal tha
to ye rang chambar-e-charkh ka nazar aae tha mujhe barmala
kabhi tha siyah kabhi zard tha kabhi sabz tha kabhi laal tha
na kisi ne qadr ki ‘jurat’ ab kahe sher garche ajab ajab
jo na honge ham to kahenge sab ki bada ye ahl-e-kamal tha
Leave a Reply