gaate hue pedon ki khunuk chhanv se aage nikal aae
ham dhuup men jalne ko tire gaanv se aage nikal aae
aisa bhi to mumkin hai mile be-talab ik muzhda-e-manzil
ham apni duaon se tamannaon se aage nikal aae
kahte hain ki jismon ko ik ruh-e-muqaddas ki dua hai
vo jism ki jo apne thake paanv se aage nikal aae
thoda sa bhi jin logon ko irfan-e-mazahib tha vo bach kar
kaabon se shivalon se kalisaon se aage nikal aae
the ham bhi gunahgar par ik zahid makkar ki zid
bazar men bikti hui salmaon se aage nikal aae
shahron ke makinon se mili jab hamen vahshat ki zamanat
ham si ke garebanon ko sahraon se aage nikal aae
banti rahi ik duniya ‘qatil’ apni kharidar magar ham
yusuf na bane aur zulekhaon se aage nikal aae
Leave a Reply