Roohi Kanjahi
aur abhi tez dauḌna hai mujhe
zindagi duur ki sada hai mujhe
huun musalsal safar men misl-e-hava
ḳhud-sari meri rahnuma hai mujhe
jaane us ki juda.i kya hogi
jis ka milna hi hadsa hai mujhe
vo bhi yaad aa.ega ḳhuda ke saath
vo bhi mamnun kar gaya hai mujhe
ho chuka ḳhatm daur ḳhvabon ka
ab haqa.eq ka samna hai mujhe
vo ki jabir hai ḳhvahishen ma.asum
ziist maidan-e-karbala hai mujhe
ḳhatm hai dil pe dastan-goi
kuchh musalsal suna raha hai mujhe
Leave a Reply