zamin ke saath falak ke safar men ham bhi hain
qafas-nasib sahi bal-o-par men ham bhi hain
vahin se luuT ga.i raston ki tanha.i
jahan pe us ne ye jaana safar men ham bhi hain
to vo shajar jo sada barg-o-bar deta hai
misal-e-ab-e-nihan is shajar men ham bhi hain
jise kahin se samundar ne la ke phenk diya
tumhare saath ik aise hi ghar men ham bhi hain
kitab the to paḌhe ja sake na duniya se
lo ab charagh hue rahguzar men ham bhi hain
ḳhayal aag hai sho.ala hai fikr lau alfaz
ye sab hunar hain to phir is hunar men ham bhi hain
‘matin’ shahar bhi sahra-nazhad hai itna
ki sang-o-ḳhisht men divar-o-dar men ham bhi hain
Leave a Reply