shikasta-hal sa be-asra sa lagta hai
ye shahr dil se ziyada dukha sa lagta hai
har ik ke saath koi vaqia sa lagta hai
jise bhi dekho vo khoya hua sa lagta hai
zamin hai so vo apni gardishon men kahin
jo chand hai so vo tuuta hua sa lagta hai
mere vatan pe utarte hue andheron ko
jo tum kaho mujhe qahr-e-ḳhuda sa lagta hai
jo shaam aai to phir shaam ka laga darbar
jo din hua to vo din karbala sa lagta hai
ye raat kha gai ik ek kar ke saare charagh
jo rah gaya hai vo bujhta hua sa lagta hai
dua karo ki main us ke liye dua ho ja.un
vo ek shaḳhs jo dil ko dua sa lagta hai
to dil men bujhne si lagti hai kaenat tamam
kabhi kabhi jo mujhe tu bujha sa lagta hai
jo aa rahi hai sada ghaur se suno us ko
ki is sada men ḳhuda bolta sa lagta hai
abhi ḳharid len duniya kahan ki mahngi hai
magar zamir ka sauda bura sa lagta hai
ye maut hai ya koi aḳhiri visal ke baad
ajab sukun men soya hua sa lagta hai
hava-e-rang-e-do-alam men jagti hui lai
‘alim’ hi kahin naghma-sara sa lagta hai