meri mahfil men agar chand sitare hote
vo bhi qurban miri jaan tumhare hote
mujh ko sahraon se jaane ki ijazat hoti
phir ye dariya na samundar na kinare hote
vo to bas jhuTi tasalli ko kaha tha tum se
ham to apne bhi nahin, ḳhaak tumhare hote
un ke pichhe bhi koi gham ka samundar hoga
varna aansu na kabhi aankh men khare hote
tere va.adon ko bhi bachchon ki tarah se rakhta
mujh se hote to sabhi raaj dulare hote
tum nahin the to miri rah ga.i izzat ‘aḳhtar’
main to paḌ jaata agar paanv tumhare hote
baat saada thi magar der men samjhe ‘aḳhtar’
duur kyuun hote agar paas tumhare hote
Leave a Reply