Sufi Tabassum
vafa ki aḳhiri manzil bhi aa rahi hai qarib
jo us jagah bhi na tu mil sake to mere nasib
fughan-e-Haqq-o-sadaqat ka marhala hai ajiib
dabe to band-o-salasil uThe to dar-o-salib
tire ḳhayal ka maskan chaman chaman ka safar
miri vafa ka nasheman faqat dayar-e-habib
nazar se bach ke mile hain vo barha mujh ko
hazar baar hua hai ye dil nazar ka raqib
ulajh na jaa.en kahin aur dil ke afsane
kahan hadis-e-mohabbat kahan bayan-e-ḳhatib
na jaane kaun si shai chashm-e-ghamgusar men thi
ki jis ko dekh ke larzan hua hai dast-e-tabib
abhi fasurda hai saaqi tira ‘tabassum’-e-lab
kisi ki yaad ko le aao mai-kade ke qarib
Leave a Reply