Jin Ki Aankhon Mein Tere KHwab Hua Karte Hain

Hasnain Aqib

jin ki ankhon men tire ḳhvab hua karte hain

vo tiri diid se sairab hua karte hain

niind bhi lazmi hai dida-e-hairat ke liye

ḳhvab yuun hi to nahin ḳhvab hua karte hain

kuchh ki ankhon men bhi jal uThte hain hasrat ke charagh

aur kuchh chehre bhi mahtab hua karte hain

kuchh takalluf bhi zaruri hai mohabbat ke liye

kuchh mohabbat ke bhi adab hua karte hain

ishq khata hai qasam jin ki vo ashiq hain ham

ya.ani ham jaise to kamyab hua karte hain

chahte hain jo tujhe un ki mohabbat ‘aqib’

tujh se mansub jo alqab hua karte hain