lo aaj samundar ke kinare pe khaḌa huun
gharqab safinon ke sisakne ki sada huun
ik ḳhak-ba-sar barg huun Tahni se juda huun
joḌega mujhe kaun ki main TuuT gaya huun
ab bhi mujhe apna.e na duniya to karun kya
mahaul se paiman-e-vafa bandh raha huun
mustaqbil-e-but-ḳhana ka hafiz hai ḳhuda hi
har but ko ye da.ava hai ki ab main hi ḳhuda huun
afkar-e-do-alam na jhinjhoḌen mujhe is vaqt
apne hi ḳhayalat ki daldal men phansa huun
manzil ka to irfan nahin itni ḳhabar hai
jis samt se aaya tha usi samt chala huun
muddat hui guzra tha idhar se mira saaya
kab se yunhi fōtpath pe ḳhamosh paḌa huun
huun aap ka bas mujh ko hai itna hi ghanimat
is se koi matlab nahin achchha ki bura huun
pahnao mire paanv men zanjir-e-bu-e-gul
avara chaman men sifat-e-bad-e-saba huun
chheḌo na mujhe jan-e-‘ziya’ fasl-e-junun men
kya main bhi koi naghma-e-andoh-ruba huun
Leave a Reply