junun shauq yaqin zabte se aa.i hai
uḌaan mujh men mire hausle se aa.i hai
mujhe bhi to kabhi bainassutur men rakhta
phir aaj ek sada hashiye se aa.i hai
bhulana jab kabhi chaha hai main ne maazi ko
nikal ke yaad tiri hafize se aa.i hai
jise ḳhayal ka markaz kabhi banaya tha
sunahri dhuup usi da.ere se aa.i hai
yaqin kar lo to a.enge sab nazar apne
tumhare dil men kaji vahime se aa.i hai
kiya hai main ne ḳhud apna muhasba aksar
tamiz mujh men isi tajarbe se aa.i hai
jo main ne soch ka badla hai zaviya ‘nayab’
har ek chiiz nazar qa.ede se aa.i hai
Leave a Reply