mumkin hi na thi ḳhud se shanasa.i yahan tak
le aaya mujhe mera tamasha.i yahan tak
rasta ho agar yaad to ghar lauT bhi ja.un
laa.i thi kisi aur ki bina.i yahan tak
shayad tah-e-dariya men chhupa tha kahin sahra
meri hi nazar dekh nahin paa.i yahan tak
mahfil men bhi tanha.i ne pichha nahin chhoḌa
ghar men na mila main to chali aa.i yahan tak
sahra hai to sahra ki tarah pesh bhi aa.e
aaya hai isi shauq men sauda.i yahan tak
ik khel tha aur khel men socha bhi nahin tha
juḌ ja.ega mujh se vo tamasha.i yahan tak
ye umr hai jo us ki ḳhata-var hai ‘shariq’
rahti hi nahin baton men sachcha.i yahan tak
Leave a Reply