har ik jannat ke raste ho ke dozakh se nikalte hain
unhen ka haq hai phulon par jo angaron pe chalte hain
haqaeq un se takra kar nae sanchon men dhalte hain
bade hi sakht-jan hote hain jo khvabon pe palte hain
guman hota hai jin maujon pe ik naqsh-e-hubabi ka
unhi soi hui maujon men kuchh tufan palte hain
vo raat akhir hui to kya ye din kab rahne vaala hai
sitare maand hote hain agar suraj bhi dhalte hain
talavvun chashm-e-saqi men taghayyur vaz-rindi men
hamare mai-kade men rose paimane badalte hain
haqaeq sard ho sakte hain sab mehrab-o-mimbar ke
magar vo khvab jo rindon ke paimane men dhalte hain
junun ne alam-e-vahshat men jo rahen nikali hain
khirad ke karvan akhir unhi rahon pe chalte hain
‘surur’-e-sada ko yuun to lahu rona hi aata hai
magar is sadgi men bhi bade pahlu nikalte hain
Leave a Reply