jis ki saundhi saundhi ḳhushbu angan angan palti thi
us miTTi ka bojh uThate jism ki miTTi galti thi
jis ko taap ke garm lihafon men bachche so jaate the
dil ke chulhe men har dam vo aag barabar jalti thi
garm do-pahron men jalte sehnon men jhaḌu dete the
jin buḌhe hathon se pak kar roTi phuul men Dhalti thi
kisi kahani men virani men jab dil ghabrata tha
kisi aziiz dua ki ḳhushbu saath hamare chalti thi
gard uḌate zard bagule dar par dastak dete the
aur ḳhasta-divaron ki pal bhar men shakl badalti thi
ḳhushk khajur ke patton se jab niind ka bistar sajta tha
ḳhvab-nagar ki shahzadi galiyon men aan nikalti thi
din aata tha aur siine men shaam ka ḳhaka banta tha
shaam aati thi aur jismon men shaam bhi aḳhir Dhalti thi
Leave a Reply