afzal-allahabadi

Ghamon Ki Dhup Mein Milte Hain Saeban Ban Kar

ghamon ki dhuup men milte hain saeban ban kar

zamin pe rahte hain kuchh log asman ban kar

ude hain jo tire qadmon se khaak ke zarre

chamak rahe hain falak par vo kahkashan ban kar

jinhen nasib hui hai tire badan ki nasim

mahak rahe hain zamin par vo gulsitan ban kar

men iztirab ke aalam men raqs karta raha

kabhi ghubar ki surat kabhi dhuan ban kar

miri sadaon ko ab to panah mil jaae

tujhe pukar raha huun tiri zaban ban kar

main is zamin ki vusat pe sair karta huun

falak ke chand sitaron ka raz-dan ban kar

masarraton ki faza men sada vo rahte hain

jo gham ke maron se milte hain mehrban ban kar

unhin ko shan-e-chaman ye zamana kahta hai

chaman ko luut rahe hain jo baghban ban kar

main harf harf jise padh chuka huun ai ‘afzal’

varaq varaq pe vo bikhra hai dastan ban kar

More Poems

Leave a Comment