Ahmad Javed
khamoshi mera lashkar hai
lafzon ki daldal
aur us men palne vaali jonken
ye mutaaffin avazen
meri yalghar ke aage sabit-qadam rahengi?
kya tum vaqai aisa samajhte ho
ki tumhare maidan itne farakh hain
ki mere asp-e-asil ko thaka denge
tumhare samundar itne mavvaj hain
ki mera rizq ulat denge
aur tumhare pahad itne sanglakh hain
ki mera jhanda na thamenge
dushman ahmaq ho to mera ghussa badha deta hai
saqahat meri muayyana maqtul hai
aur khush-fahmi muqarrara mazbuh
meri chinghad sur-e-israfil ka pesh-ahang hai
lafz ki minminahat se paak
andhe sayyaron ke takrao ki mafauq-e-samaat gadgadahat
avaz ki mukammal minhai ka shor
likhe hue lafz ko bhi shaq kar deta hai
ye ibaraten tumhara saf-basta lashkar hain
farzi hathiyaron se musallah ye lashkar
jise khayali qilon ke brij girane ka bada tajraba hai
is ki na-budi meri ek chup ke fasle par hai
yaad! rakhna
mere paas koi rassi nahin hoti
jo tumhare gale men dalne aur
tumhare haath bandhne ke kaam aae
mera fitrak hamesha khali rahta hai
aur mere qaid-khane kabhi abad nahin rahe
main jang se pahle hi dushman shumar kar leta huun
phir maqtulin ki ginti nahin karta
sab jante hain
mujh par neza phenkne valon ki paspai na-tamam rahti hai
meri haibat se zamin maqnatis banti hai
aur hava kohrbai karti hai
mera shikar bijliyan hankti hain
maut mera tarkash utha kar chalti hai
aur mera rath andhiyan khinchti hain
lafzon ke maktub jangal itne ghane nahin hain
ki tumhen aag ki barish se tar-ba-tar na hone den
sarf-o-nahv ka saeban itna bada nahin hai
ki sitara-e-ajal tum se ojhal rah jaae
kitabon se itni unchi divar nahin banti
ki qital sannata phalang na sake
kya hasin duniya thi
jise tum ne lafzon se daghdar kar diya
us ke tabinda afaq
in pinjron men ghat kar saqitushshams ho gae hain
kaisi zinda zamin thi
jis men tum ne zahr bo diya
kaisa raushan asman tha
jise tum tariki ke mafhum men sarf kar chuke ho
tum ne shuur ko jhuta
aur fitrat ko gadla kar diya hai
mahz zaban ke chatkhare ke liye
tum ne vajud ka asas-ul-bait
farhangon ke mol bech khaya
main kaenat ki bazyabi ke liye nikla huun
mera khanjar lafz ka pet chaak karega
maani ki zambil phaad dalega
aur kazzab isharon ke haath qalam kar dega
jinhon ne sayyaron ko gumrah kar rakha hai
be-zabanon ko muzhda ho
haqiqat ka asli tanazur bahal hone ko hai
tumhare dushman fasilon ke tasavvur men mahsur hain
siyah aine ki ye makhluq
jis ki manhus parchhain ne
har taraf shor macha rakkha hai
khud hi apna madfan hai
meri akhiri yalghar se ho jaenge saare manazir
saari avazen
azad
na-malfuz….
Leave a Reply