bikhar jaa.e na meri dastan tahrir hone tak
ye ankhen bujh na jaa.e ḳhvab ki ta.abir hone tak
chala.e ja abhi tesha qalam ka koh-e-zulmat par
siyahi vaqt bhi leti hai ju-e-shir hone tak
isi ḳhatir mire ash.ar ab tak Diary men hain
kisi aalam men ji lenge ye alamgir hone tak
tire aghaz se pahle yahan jugnu chamakte the
ye basti muflison ki thi tiri jagir hone tak
mujhe tanz-o-malamat ki baḌi darkar hai yuun bhi
ana ko shaan bhi to chahiye shamshir hone tak
mohabbat aḳhirash le aa.i hai ik band kamre men
teri tasvir ab dekhunga ḳhud tasvir hone tak
Leave a Reply