Azhar Faragh
tire ba.ad koi bhi gham asar nahin kar saka
koi saneha miri aankh tar nahin kar saka
mujhe ilm tha mujhe kam paḌegi ye raushni
so main inhisar charagh par nahin kar saka
mujhe jhuuT ke vo javaz pesh kiye ga.e
kisi baat par main agar-magar nahin kar saka
mujhe chaal chalne men der ho ga.i aur main
koi ek mohra idhar-udhar nahin kar saka
ka.i paikaron ko mire ḳhayal ne shakl di
jinhen runuma mira kuza-gar nahin kar saka
mire as-pas ki muflisi miri ma.azarat
tira intizam main apne ghar nahin kar saka
Leave a Reply