Zia Zameer
ye jo har lamha na rahat na sakun hai yuun hai
us ko paane ka ajab dil men junun hai yuun hai
adatan karta hai vo va.ada-ḳhilafi pahle
phir banata hai bahane bhi ki yuun hai yuun hai
mujh ko ma.alum hai lauT aa.ega meri janib
us ke jaane pe bhi is dil men sukun hai yuun hai
dil ka khinchna jo ye jaari hai faqat us ki taraf
us ki ankhon men alag sa hi fusun hai yuun hai
puchhte ho ki bhala kyuun nahin mayusi hai
us ke honTon pe jo ahista si huun hai yuun hai
be-sabab hai ye kahan dasht-navardi bhi ‘ziya’
apne zimme bhi koi kar-e-junun hai yuun hai
Leave a Reply