ahmad-mahfuz

Raqs-e-Sharar Kya Ab Ke Wahshat-Nak Hua

raqs-e-sharar kya ab ke vahshat-nak hua

jalte jalte sab kuchh jal kar khaak hua

sab ko apni apni padi thi puchhte kya

kaun vahan bach nikla kaun halak hua

mausam-e-gul se fasl-e-khizan ki duuri kya

aankh jhapakte saara qissa paak hua

kin rangon is surat ki tabir karun

khvab-nadi men ik shola pairak hua

nadan ko aina hi ayyar kare

khud men ho kar vo kaisa chalak hua

tariki ke raat azaab hi kya kam the

din nikla to suraj bhi saffak hua

dil ki ankhen khol ke raah chalo ‘mahfuz’

dekho kya kya aalam zer-e-khak hua

More Poems

Leave a Comment