naya suraj naya dariya na.i kashti banate hain
na.i tasvir men duniya zara maili banate hain
zara sa cute kar dete hain andeshon ke bhuton ko
magar ummid ki pariyan zara ugly banate hain
mukammal soch lete hain chalo is baar phir tujh ko
chalo is baar bhi surat tiri aadhi banate hain
yaqini baat hai batin ki tariki na kam hogi
tasalli ke liye zahir ko nurani banate hain
jahan ḳhvabon ka kambal oḌh kar soti hain avazen
vahin raton men kuchh divane ḳhamoshi banate hain
vo kankar phenkte hain jhiil men kya soch kar ‘sabir’
fana karte hain ḳhud ko ya ki la-sani banate hain
Leave a Reply