Jameel Yusuf
aadmi apni zaat men tanha
alam-e-shash-jihat men tanha
ai ḳhuda tu hi be-misal nahin
main bhi huun ka.enat men tanha
mujh ko har ek baat ka gham hai
main huun har ek baat men tanha
maut ke dasht-e-be-kanar men gum
shahr ke hadsat men tanha
mujh ko kis jurm men utaar diya
kar-zar-e-hayat men tanha
be-aman dushmanon ki zad men huun
dahr ke somnat men tanha
ap-apni talash hai mujh ko
huun ajab mushkilat men tanha
Leave a Reply