Nabeel Ahmad Nabeel
hazar koshish-e-paiham ke bavajud hamen
tamam umr koi dost ba-vafa na mila
kahan ka vasl mulaqat hi ghanimat hai
phir us ke ba.ad vo ham se mila mila na mila
vo jis ko ham ne zamane se baḌh ke chaha tha
us ek shaḳhs ki chahat men kuchh maza na mila
tiri juda.i ke sahra men kho ga.e aise
suragh apna kahin aur kahin pata na mila
ye ka.enat ki be-rang hoti jaati hai
jo dil ka rang dikhati vo aa.ina na mila
talashte rahe kanTon men phuul se paikar
mizaj ham ko azal se hi ashiqana mila
tamam umr hi raston ki ḳhaak chhani hai
hamen to manzil-e-hasti tira pata na mila
hamen jo raah dikhata qadam qadam pe ‘nabil’
misal-e-ḳhizr koi aisa rahnuma na mila
ḳhud aap apne muqabil men aa ga.e hain ‘nabil’
hamen mizaj mila bhi to baghiyana mila
Leave a Reply