hava ka shor sada-e-sahab mere liye
jahan-e-jabr ka har iztirab mere liye
sulagta jaata huun main aur paḌhta jaata huun
khula paḌa hai zamane ka baab mere liye
main muntazir tha jahan par gulab khilne ka
vahin pareshan thi bu-e-gulab mere liye
ye meri umr ki shab ye uḌi hui ninden
na koi ḳhvab na afsun-e-ḳhvab mere liye
tabah kar diya ahde-javan ki baton ne
shabab is ke liye tha sharab mere liye
jahan hai nashsha-e-ḳhvab-e-sahar men khoya hua
hai sar pe aaya hua aftab mere liye
raha hai dhyan men ik jism chand sa ‘ja.afar’
hui vahan hai shab-e-mahtab mere liye
Leave a Reply