kab apni khushi se vo aae hue hain
mire jazb-e-dil ke bulae hue hain
kaji par jo aflak aae hue hain
un ankhon ke shayad sikhae hue hain
kabhi to shahidon ki qabron pe aao
ye sab ghar tumhare basae hue hain
kiya hai jo kuchh zikr mujh dil-jale ka
pasine men bilkul nahae hue hain
zara phuul se paanv maile na honge
tum aao ham ankhen bichhae hue hain
kahin khaak bhi ab na baithegi apni
ki un ki gali se uthae hue hain
girega zamin pe na khun-e-shahidan
abas aap daman uthae hue hain
faqat paas hai un ke tir-e-nigah ka
jo siine se dil ko lagae hue hain
janaza mira dosto kal uthana
ki vo aaj mehndi lagae hue hain
unhen paas hai dil hamara muqarrar
vahi ham se ankhen churae hue hain
jo hai ghar ke andar vahi ghar ke bahar
vo ankhon men dil men samae hue hain
mere baad jaane ke utrenge kyun-kar
ye kapde jo mere pinhae hue hain
na ho sabza-rangon men kyuun un ki shohrat
mire qatl par zahr khaae hue hain
mire khat ke purze udaae unhon ne
kisi ke sikhae padhae hue hain
khuda zulf se dil jigar ko bachae
bade pech men donon aae hue hain
tadap kar shab-e-hijr men kyuun na rouun
chamakti hi barq abr aae hue hain
‘taashshuq’ vo jo chahen baten sunaen
sar-e-ijz ham to jhukae hue hain