Shahid Kamal
fikr-e-ijad men huun khol naya dar koi
kunj-e-gul bhej miri shaḳh-e-hunar par koi
rang kuchh aur nichoḌenge lahu se apne
phir tarashenge ham ik aur naya paikar koi
bhej kuchh taaza kumak mere musafir ke liye
phir utarta hai mire dasht men lashkar koi
astinon men havaon ne chhupaya hua hai
ham ne dekha hai chamakta hua ḳhanjar koi
kya hua ab ki safar men ye mujhe yaad nahin
mujh se roya tha bahut der lipaT kar koi
zaḳhm ankhon se Tapakta hai lahu ki surat
yuun chalata hai mire siine men nashtar koi
ḳhud ta.aqub men miri ghaat laga.e kab se
chhup ke baiTha hai mire jism ke andar koi
ek sahil ka tamasha.i hai bas mera vajud
meri miTTi men hai poshida samundar koi
apni fikron se lahu karte hain lafzon men kashid
‘shahid’ aise nahin hota hai suḳhnavar koi
Leave a Reply