kuchh kahe jaata tha gharq apne hi afsane men tha
marte marte hosh baaqi tere divane men tha
haae vo khud-raftagi uljhe hue sab sar ke baal
vo kisi men ab kahan jo tere divane men tha
jis taraf jaae nazar apna hi jalva tha ayaan
jism men ham the ki vahshi aina-khane men tha
boriya tha kuchh shabina mai thi ya tuute subu
aur kya is ke siva maston ke virane men tha
hanste hanste ro diya karte the sab be-ikhtiyar
ik nai tarkib ka dard apne afsane men tha
sun chuke jab haal mera le ke angdai kaha
kis ghazab ka dard zalim tere afsane men tha
duun ki leta to hai zahid magar main kya kahun
muttaqi saaqi se badh kar kaun mai-khane men tha
paas tha zanjir tak ka tauq par kya munhasir
vo kisi men ab kahan jo tere divane men tha
der tak main taktaki bandhe hue dekha kiya
chehra-e-saqii numayan saaf paimane men tha
haae parvane ka vo jalna vo rona shama ka
main ne roka varna kya aansu nikal aane men tha
khud-gharaz duniya ki halat qabil-e-ibrat thi ‘shad’
lutf milne ka na apne men na begane men tha
‘shad’ kuchh puchho na mujh se mere dil ke daagh ko
timtimata sa charagh ik apne virane men tha
Leave a Reply