kuchh dard hai mutribon ki lai men
kuchh aag bhari hui hai nai men
kuchh zahr ugal rahi hai bulbul
kuchh zahr mila hua hai mai men
bad-mast jahan ho raha hai
hai yaar ki bu har ek shai men
hai masti-e-nim-kham ka dar
israr hai jam-e-pai-ba-pai men
mai-khana-nashin qadam na rakkhen
bazm-e-jam o bargah-e-kai men
ab tak zinda hai naam vaan ka
guzra hai husain ek ”hai” men
hoti nahin tai hikayat-e-”tai”
guzra hai karim ek ”tai” men
kuchh ‘shefta’ ye ghazal hai aafat
kuchh dard hai mutribon ki lai men
Leave a Reply