uljhao ka maza bhi tiri baat hi men tha
tera javab tire savalat hi men tha
saaya kisi makin ka bhi jis par na paḌ saka
vo ghar bhi shahr-e-dil ke mazafat hi men tha
ilzam kya hai ye bhi na jaana tamam umr
mulzim tamam umr havalat hi men tha
yaron ko inhiraf ka jis par raha ghurur
vo rasta bhi dasht-e-rivayat hi men tha
ab to faqat badan ki muravvat hai darmiyan
tha rabt-e-jan-o-dil to shuruat hi men tha
mujh ko jo qatl kar ke manata raha hai jashn
vo bad-nihad shaḳhs miri zaat hi men tha
Leave a Reply