ajiz-matvi

Har-Su Jahan Mein Sham O Sahar dhundte Hain Hum

har-su jahan men shaam o sahar dhundte hain ham

jo dil men ghar kare vo nazar dhundte hain ham

in bastiyon ko phunk ke ḳhud apne haath se

apne nagar men apna vahi ghar dhundte hain ham

juz reg-zar kuchh bhi nahin ta-hadd-e-nigah

sahra men saya-dar shajar dhundte hain ham

taslim hai ki juḌta nahin hai shikasta dil

phir bhi dukan-e-aina-gar dhundte hain ham

jis ki ada ada pe ho insaniyat ko naaz

mil jaae kaash aisa bashar dhundte hain ham

kuchh imtiyaz-e-maz.hab-o-millat nahin hamen

ik mo’tabar rafiq-e-safar dhundte hain ham

is daur men jo fan ko hamare parakh sake

vo sahab-e-zaban-o-nazar dhundte hain ham

haath aaega na kuchh bhi ba-juz sang-e-be-bisat

uthle samundaron men guhar dhundte hain ham

‘ajiz’ talash-e-sham.a men parvane mahv hain

hairat unhen hai un ko agar dhundte hain ham

More Poems

Leave a Comment